Kocha Mkuu wa Yanga Luc Eymael ameeleza kushangazwa na taarifa za baadhi ya wachezaji wa timu hiyo kuongezeka uzito
Akizungumza na wanahabari jana baada ya kuwasili kutoka Ubelgiji, Eymael alisema, alikuwa akitoka program za mazoezi ambazo zingewasaidia wachezaji kubaki katika viwango vyao kabla ya corona
"Taarifa za wachezaji kuongezeka uzito nilizipata tangu nikiwa Ubelgiji. Inashangaza kwa sababu nilitoa program mbili za mazoezi ambayo kama wachezaji wangeyafanya kwa ufasaha wote miili yao ingekuwa sawa"
"Hii itakuwa changamoto kwetu kwani kwa bahati mbaya hata kocha wetu wa viungo (Berdien Riedoh) anaweza kuchelewa kurudi, mkewe atajifungua hivi karibuni," alisema Eymael
Agoma kuzungumzia ishu ya Molinga
Katika hatua nyingine, Eymael alieleza kupewa taarifa juu ya mshambuliaji David Molinga kugoma kusafiri na timu kwenda Shinyanga akidai 'kubainiwa' na kocha msaidizi Charles Mkwasa
Mbelgiji huyo amesema hafahamu nini kilitokea mazoezini kwani hakuwepo
"Nilitumiwa ujumbe na mtu nisiyemfahamu akinieleza kuwa Molinga analalamika kwamba kocha msaidizi hamtendei haki. Hata hivyo siwezi kuzungumza chochote juu ya hilo kwa kuwa sifahamu nini kilitokea kwenye mazoezi kwani sikuwepo," alisema
Eymael anatarajiwa kusafiri leo kwa ndege kuelekea jijini Mwanza kisha kuunganisha Shinyanga kuungana na kikosi cha Yanga ambacho keshokutwa kitashuka uwanja wa CCM Kambarage kuumana na Mwadui FC
