Rais wa La Liga Javier Tebas amesema ushirikiano wa kampuni yake na klabu ya Yanga, ni fursa itakayokuwa na manufaa kwa Yanga pamoja na La Liga
Wiki iliyopita Yanga ilifungua ukurasa mpya wa mchakato wa mabadiliko ya mfumo wa uendeshaji wa klabu hiyo ambao awamu ya kwanza unasimamiwa na La Liga wenye jukumu la kutoa mapendekezo na ushauri kwa mabingwa hao wa kihistoria
Tebas amesema mkataba walioingia na Yanga umepanua wigo wa majukumu yao ambapo watakuwa na nafasi ya kuonyesha uwezo wao katika kubadili na kuleta changamoto mpya ya maendeleo kwenye soka barani Afrika
"Kupiga chapuo uendeshaji wa kiweledi kwa soka la Afrika na Duniani kote ni dhima tulizonazo kama La Liga katika mkakati wa kujitanua kimataifa. Mkataba huu tuliosaini na GSM na Yanga ni mwanzo mzuri kwetu"
"Tunajivunia kufanya kazi na klabu ya Yanga, tunawahakikishia, huduma ya ushauri tunayokwenda kuwapatia, itakuwa na mafanikio makubwa kwa klabu hiyo," ilieleza sehemu ya taarifa iliyotolewa na Tebas kwa Wanahabari
GSM wadhamini/wahisani wa Yanga wanasimamia gharama za mchakato wote ambao mpaka kumalizika kwake utachukua miaka miwili na nusu mpaka mitatu
Katika miezi sita ya kwanza, Wataalamu wa La Liga watakuwepo hapa nchini kufanya kazi bega kwa bega na kamati ya Mabadiliko ya klabu ya Yanga inayoongozwa Wakili Msomi Alex Mgongolwa
La Liga watakuwa na jukumu la kutoa maoni na mapendekezo ya aina ya mfumo ambao Yanga wanapaswa kufuata kufuatana na mazingira yetu
Mapendekezo hayo yatajadiliwa kisha kufikishwa mbele ya Wanachama wa Yanga kupitia Mkutano Mkuu wa klabu ambao utafanya maamuzi ya Mwisho
