Kocha Msaidizi wa Yanga Charles Mkwasa ametaja sababu ya kutomtumia winga Juma Mahadhi juzi kwenye mchezo wa kirafiki dhidi ya Transit Camp ambao ulimalizika kwa Yanga kushinda mabao 3-1
Katika mchezo huo, Mkwasa alimpa nafasi beki Paulo Godfrey 'Boxer' ambaye alicheza kwa takribani dakika sabini
Boxer nae amerejea kikosini baada ya kuwa majeruhi tangu mwezi Septemba mwaka jana
Mkwasa amesema Mahadhi anahitaji kurejeshwa dimbani kwa tahadhari kubwa kutokana na majeraha yaliyouweka nje kwa karibu miaka miwili
"Kwa wale waliofuatilia mchezo wa juzi (dhidi ya Transit Camp) watakubaliana nami, ulikuwa ni mchezo wa nguvu sana. Isingekuwa sahihi kumtumia Mahadhi kwani bado anatakiwa kupata kashikashi zaidi mazoezini kabla ya kucheza mechi. Atapewa nafasi taratibu dakika tano.., kumi.. ili kuhakikisha anaimarika kwa awamu na hatoneshi majeraha," alisema Mkwasa
