Wakati kukiwa na tetesi kuwa Yanga huenda ikamsajili kiungo wa zamani wa Simba James Kotei, taarifa zaidi zimebainisha kuwa mabingwa hao wa kihistoria wamemalizana na mshambuliaji wa Asante Kotoko Yacouba Sogne ambaye amemaliza mkataba na klabu hiyo
Sogne ni miongoni mwa wachezaji ambao walianza kufuatiliwa mapema na Yanga lakini dili lake lilikuwa gumu kukamilishwa kutokana na dau kubwa la usajili alilokuwa akitaka
Lakini kulingana na gazeti la Mwanaspoti, Wakala wa wachezaji Alfred Raul ambaye anaishi Ufaransa, amesema Meneja wa Sogne amemthibitishia kuwa nyota huyo anatua Yanga
Raul ambaye amedai kuzungumza na Yacouba pia, amesema nyota huyo anasubiri kuruhusiwa kwa safari za ndege huko kwao Burkina Faso ili aweze kuja nchini kusaini mkataba, akiwa tayari amesainishwa mkataba wa awali na mabingwa hao wa kihistoria
Dili la Yacouba huenda likafuta mpango wa Yanga kumsajili mshambuliaji wa Rayon Sports Michael Sarpong ambaye hivi karibuni klabu yake ilitangaza kumsamehe na kumrudisha kikosini
Aidha kuhusu ishu ya Kotei, Meneja huyohuyo wa Yacouba ndiye anayesimamia mpango wa kumleta Kotei ambaye kwa sasa anacheza kule nchini Belarus
Bernard Morrison na Lamine Moro ambao ni Waghana, wanatajwa kuwa na ushawishi kwa Kotei ambaye mwezi Januari aligoma kutua Yanga dakika za mwisho akidai atawaudhi mashabiki wa Simba
Ujio wa Kotei pia huenda ukafuta mpango wa Yanga kumsajili kiungo Ally Niyonzima ambaye anatajwa kuwa pendekezo la kocha Luc Eymael
Inaelezwa Yanga pia imekamilisha mazungumzo na aliyekuwa mfungaji bora wa ligi ya DR Congo Mpiana Monzizi wa FC Lupopo ambaye mpaka msimu unafutwa alikuwa na mabao 12 sawa na Jackson Muleka wa TP Mazembe
Pia mabingwa hao wa kihistoria watamshusha nchini winga hatari wa AS Vita Tuisila Kisinda
Usajili wa nyota hao juzi ulidokezwa na Mkurugenzi wa Uwekezaji GSM Mhandisi Hersi Said ambaye ndiye anayesimamia dili zote za usajili zilizochini ya GSM
Injinia Hersi alidokeza kuwa watasajili mfungaji bora kutoka moja ya ligi tano bora barani Afrika lakini pia watamsajili winga hatari kutoka moja ya ligi hizo
Kulingana na takwimu zilizotolewa na shirikisho la soka barani Afrika (CAF) wiki iliyopita, Ligi ya DR Congo iko katika orodha ya ligi tano bora barani Afrika
