Kocha Mkuu wa Yanga Luc Eymael ni kocha anayeipenda kazi yake na hataki masihara linapokuja suala la majukumu ya kazi
Eymael anasifika kwa kutodumu kwa muda mrefu kwenye vilabu na hii ni kutokana na misimamo yake mikali
Ni juzi tu aliwalaumu viongozi wa Yanga kwa kuchelewa kumtumia tiketi ya ndege ili aweze kurejea nchini
Hata hivyo jana akathibitisha tayari ametumiwa tiketi na kuahidi kuwa mpaka mwishoni mwa wiki atakuwa amewasili nchini
Pamoja na misimamo yake mikali, Eymael ana sifa moja, ni kocha mwenye mafanikio makubwa katika timu alizofundisha
Kocha huyo amekusanya mataji sita ndani ya miaka 10. Ni sifa hiyo iliyomfanya apate ajira ndani ya klabu ya Yanga ambapo gharama zake zote zinalipwa na GSM
Katika malengo yake ya msimu huu, ni kuhakikisha Yanga inashinda taji la FA ili kupata nafasi ya kushiriki michuano ya CAF Confederation msimu ujao
Mbelgiji huyo amesema anahitaji kujenga kikosi imara kwa ajili ya msimu ujao, kupata tiketi ya kushiriki michuano ya CAF kutamrahisishia kuwapata wachezaji anaowataka kwenye timu yake
Pengine hii ndio sababu iliyomfanya awe mkali pale alipoona uongozi wa Yanga unachelewa kumtumia tiketi ili arudi kuwahi kukiandaa kikosi chake
