Nahodha wa Yanga Papy Tshishimbi amesema makubaliano ya ushirikiano ambayo Yanga imeingia na wasimamizi wa Ligi Kuu ya Hispania (La Liga) na klabu ya Sevilla, ni fursa kwao
Jana klabu ya Yanga iliandika historia mpya kwa kuingia makubaliano ya ushirikiano na La Liga ambayo yataishuhudia kampuni hiyo inayosimamia vilabu 42 vya ligi kuu na ligi daraja la kwanza nchini Hispania, kushirikiana na Yanga kwenye mchakato wa Mabadiliko ya mfumo wa uendeshaji wa mabingwa hao wa kihistoria
Aidha makubaliano hayo pia yameihusisha klabu ya Sevilla ambayo itakuwa na ushirikiano wa moja kwa moja na Yanga, kuanzia timu za vijana mpaka benchi la ufundi
"La Liga ni kampuni kubwa, wanasimamia ligi maarufu duniani. Sevilla ni klabu kubwa imewahi kushinda ligi ya Europa mara tatu mfululizo. Kwetu wachezaji, ushirikiano huu ni fursa nzuri sana kwani inaweza kuwa njia ambayo itatusaidia kupata nafasi ya kwenda kucheza Hispania," alisema Tshishimbi
Aidha Tshishimbi ameongeza kuwa Mabadiliko ya uendeshaji Yanga yataifanya timu hiyo iimarike zaidi kiuchumi, hilo litaongeza ushindani miongoni mwao wachezaji kwani timu itakuwa na uwezo wa kusajili wachezaji bora na wale ambao hawatakuwa na viwango vizuri wanaweza kupoteza nafasi zao
Tshishimbi akiwa nahodha wa Yanga, sambamba na nahodha msaidizi Juma Abdul, walihudhuria hafla hiyo ya kusainiwa mkataba ambayo ilifanyika Hoteli ya Serena jijini Dar es salaam
