Klabu ya Yanga imesaini makubaliano na kampuni ya La Liga ambayo itakuwa na jukumu la kushauri mfumo sahihi ya Uendeshaji wa klabu hiyo pamoja na kusaini mkataba wa ushirikiano na klabu ya Sevilla inayoshiriki ligi kuu ya Hispania
Mkataba wa ushirikiano baina ya pande zote umesainiwa usiku wa leo, ukianza kusainiwa kule Hispania na mabosi wa La Liga na Sevilla kisha kutumwa nchini kusainiwa na Mwenyekiti wa Yanga Dk Mshindo Msolla kwa niaba ya Yanga na Mhandisi Hersi Said, Mkurugenzi wa Uwekezaji GSM
Mkataba huo utaifanya Yanga kuwa klabu ya kwanza ukanda wa Afrika Mashariki na Kati kuingia makubaliano ya ushirikiano wa moja kwa moja na La Liga
Aidha kupitia makubaliano hayo, Yanga itapata fursa ya kushirikiana moja kwa moja na klabu ya Sevilla katika ngazi zote kuanzia soka la vijana, kikosi cha kwanza na benchi la ufundi
Wachezji wa timu ya Yanga hasa vijana watapata fursa ya kwenda kufanya majaribio na kujiunga na timu ya vijana ya Sevilla huku viongozi na benchi la ufundi watapata fursa ya kwenda kujifunza Hispania
Tukio hilo la kihistoria lilishuhudiwa na Rais Mstaafu Awamu ya Nne Dk Jakaya Mrisho Kikwete ambaye alikuwa mgeni wa heshima
Aidha nahodha wa Yanga Papy Tshishimbi na Juma Abdul wao waliwawakilisha wachezaji wengine katika tukio hilo lililoingia kwenye kumbukumbu za klabu ya Yanga
Sasa ni rasmi Yanga imeanza mchakato wa Mabadiliko chini ya ushauri wa La Liga
