Mashabiki wa Yanga wanahesabu masaa tu washuhudie tukio kubwa kabisa na la kihistoria kwa timu yao kuanza rasmi mchakato wa mabadiliko ya mfumo wa Uendeshaji wa klabu hiyo
Furaha zaidi ni pale watakapoishuhudia kampuni ya La Liga inayosimamia ligi kuu ya Hispania ambayo ndio inayotawala soka la Ulaya, ikiingia kandarasi ya kusimamia mabadiliko ya uendeshaji Yanga
Mpaka kufikia hatua hii uongozi wa Yanga chini ya Mwenyekiti Dk Mshindo Msolla wanastahili pongezi kwani huko nyuma kuna viongozi walijaribu kufanya mabadiliko bila ya mafanikio
Lakini pia huwezi kuzungumzia mabadiliko haya yanayokwenda kutimiza ndoto za Wanayanga bila ya kuitaja kampuni ya GSM
GSM wamejitoa kwa dhati kuhakikisha wanaifanya Yanga kuwa taasisi kubwa inayojitegemea sawa na jina lake
Si jambo rahisi kujitolea kugharamia mchakato wa mabilioni kama huu, GSM wanastahili kongole
Yanga ni taasisi yenye heshima kubwa na historia Tanzania na hata Afrika nzima
Kwa miaka ya karibuni ni kama heshima hiyo ilishuka kutokana na changamoto zilizoikabili timu hiyo
Lakini hakuna shaka, baada ya tukio la kusaini mkataba na La Liga siku ya Jumapili, heshima ya Yanga itarejea mahali pake kwa kasi
Kwa kufanya kazi na La Liga tu, umaarufu wa Yanga utapaa kote duniani. Mabingwa hao wa kihistoria watajitengenezea fursa kedekede
Na pale mchakato mzima utakapokamilika, makampuni mengi yataigombania Yanga wakitaka kuwekeza biashara zao
