Kikosi cha Yanga kimeanza mazoezi leo baada ya miezi miwili ya kukaa nyumbani pasipo kucheza mpira kutokana na changamoto ya ugonjwa wa Corona
Mazoezi ya leo yamefanyika uwanja wa Chuo ya Sheria, Ubungo Mawasiliano chini ya kocha msaidizi Charles Mkwasa
Katika siku ya kwanza ya mazoezi, Mkwasa aliwapa wachezaji muda mrefu wa kucheza mpira
Mkwasa ameeleza kuridhishwa na mwenendo wa timu yake lakini amesema wachezaji wake watahitaji muda kuweza kurejea katika ubora wao
"Kimsingi wachezaji wanaonekana kuwa wako fiti, nadhani kila mmoja alikuwa akifanya mazoezi ya nguvu wakati yuko nyumbani"
"Lakini nimeona shida kidogo kwenye umiliki wa mpira, nadhani imechangiwa na wachezaji kufanya mazoezi magumu bila ya kucheza mpira"
"Tutazifanyia kazi changamoto tulizoziona ili kuhakikisha tunakuwa sawa kabla ya ligi kurejea," amesema Mkwasa
Yanga ina viporo vya michezo 11 pale ligi itakaporejea. Wanashika nafasi ya tatu kwenye msimamo wa ligi wakiwa wamejikusanyia alama 51
