Kocha Mkuu wa Yanga Luc Eymael amesema hana wasiwasi kikosi chake kuwa chini ya kocha Msaidizi Charles Mkwasa kwani anamuamini
Eymael amekwama nchini Ubelgiji akikabiliwa na changamoto ya usafiri kurejea nchini ambapo amebainisha kuwa anaweza kusafiri Juni 01
Uongozi wa Yanga umemkabidhi majukumu ya kuiongoza timu Mkwasa ili kuhakikisha kikosi kinakuwa tayari pale ligi itakaporejea
"Sina tatizo kabisa kwa Mkwasa kukabidhiwa timu. Nafahamu ni kocha mwenye uzoefu mkubwa na nitajitahidi kushirikiana nae pamoja na kuwa bado niko hapa Ubelgiji, " alisema Eymael
Aidha Eymael amesema kuwa anasubiri uongozi wa Yanga kukamilisha taratibu za safari yake lakini anaweza kuondoka Ubelgiji May 31 na ndege ambayo inasafiri moja kwa moja kuja Tanzania
"Nasubiri taratibu zikamilishwe na Yanga lakini ningependa nisafiri na ndege ambayo itatua Tanzania Juni mosi"
Mbelgiji huyo amesema timu yake inahitaji kufanya vizuri katika mechi zilizobaki akiitizama zaidi michuano ya kombe la FA ambayo inaweza kuwapa nafasi ya kushiriki michuano ya Kombe la Shirikisho Barani Afrika msimu ujao
Kikosi cha Yanga kinaanza mazoezi leo kujiandaa na mikiki mikiki hiyo
