Kocha Mkuu wa Yanga Luc Eymael amesema wamepania kumaliza msimu kwa heshima ili kuhakikisha wanapata nafasi ya kushiriki michuano ya CAF msimu ujao
Eymael yuko kwenye mchakato wa kurejea nchini. Makamu Mwenyekiti wa Yanga Fredrick Mwakalebela amesema tayari wamechukua hatua kuhakikisha kocha huyo anarejea mapema licha ya changamoto ya usafiri inayomkabili huko Ubelgiji
Mbelgiji huyo amesema pamoja na kuwa na nafasi finyu ya kutwaa ubingwa, amesema watahakikisha angalau wamalize nafasi ya pili huku akipigia hesabu michuano ya FA
"Haitakuwa rahisi kuishusha Simba katika nafasi ya kwanza lakini nina imani kubwa kuwa tunaweza kufanya vizuri hata angalau kumaliza katika nafasi ya pili. Tutaanza kufanya mazoezi pamoja, tutaangalia utimamu wa miili ya wachezaji wetu ambao walikuwa wakifanya mazoezi peke yao"
"Tunahitaji kumaliza msimu kwa kishindo, ni lengo letu kuhakikisha tunapata nafasi ya kushirki michuano ya Kimataifa msimu ujao, tutahitaji kushinda taji la FA," alisema
Aidha Eymael ameeleza kufurahishwa na uamuzi wa Serikali kuamua mechi zote za ligi kuu na kombe la FA zipigwe jijini Dar es salaam
Eymael ni miongoni mwa makocha waliotoa mapendekezo akishauri mechi hizo zichezwe katika kituo kimoja hasa Dar es salaam kutokana na mji huo kuwa na miundombinu ya kutosha
