Bodi ya Ligi imesema inajadili utaratibu watakaoutumia kumaliza mechi 90 za ligi kuu zilizobaki ili kukamilisha msimu
Kumekuwa na hoja kinzani kuhusu utaratibu ambao unapaswa kufuatwa kukamilisha msimu ambapo baadhi ya wadau wamependekeza mechi zipigwe katika kituo kimoja huku wengine wakipendekeza utaratibu wa kawaida wa mechi kuchezwa nyumbani na ugenini utumike
Mwenyekiti wa Bodi hiyo Steven Mguto amesema watatoa uamuzi wa pamoja baada ya kufikia mwafaka lakini amekiri wanaangalia uwezekano wa mechi hizo kupigwa katika kituo kimoja (Dar es salaam) kama timu zote zitaafiki
"Tuna mapendekezo mbalimbali tunayajadili kuona ni vipi tunaweza kukamilisha msimu. Lakini kama timu zote zitakubaliana mechi zichezwe katika kituo kimoja basi hatutakuwa na pingamizi," amesema
Mguto pia amesema wanaangalia uwezekano wa kuvisaidia vilabu ambavyo vimekummbwa na hali tete ya kiuchumi kutokana na janga la corona
Ikumbukwe ligi itakaporejea mechi zote zitapigwa bila ya uwepo wa mashabiki na kama utaratibu wa mechi kupigwa nyumbani na ugenini utatumika, ni wazi timu zitapaswa kuwa na fedha kuweza kusafiri pamoja na kugharamia kambi kila wanapokwenda
Mguto amezitaka timu ziwe na subira kwa kufuata maelekezo yanayotolewa na Serikali, wakati sahihi wa ligi kurejea utakapotangazwa na Serikali, wao wako tayari
