Mchambuzi mahiri wa soka nchini Edo Kumwembe anasema hoja ya kupunguza nyota wa kigeni kwenye ligi zetu haina mashiko kwa kuwa hata idadi ya wageni ni wachache sana ukilinganisha na wazawa
Lakini pamoja na wazawa kuwa wengi, bado ukiangalia timu zinazofanya vizuri ni zile zenye wachezaji wengi wa kigeni
Kwa maana rahisi ni kuwa kama utapunguza idadi ya nyota wa kigeni katika vilabu vyetu, pia tutashusha viwango vya baadhi ya timu ambazo zinamudu gharama ya kuwa na idadi ya nyota wa kigeni waliopendekezwa
Hapa hoja ya msingi sio kupunguza idadi ya nyota wa kigeni bali ni kuinua viwango vya wachezaji wazawa kwa kutengeneza program nzuri za soka zitakazowasadia kuinuka
Jitihada zinazofanywa sasa na TFF za kuvitaka vilabu vyote vinavyoshiriki ligi kuu kuwa na timu za vijana U17 na U20, inafaa zitiliwe mkazo kwani miaka michache baadae faida yake inaweza kuonekana
Lakini pia suala la viwanja nalo liangaliwe kwa jicho tofauti. Kumekuwa na uhaba wa viwanja bora vya soka hapa nchini. Suala la kutengeneza wachezaji wazuri linahitaji miundombinu mizuri ya viwanja
Kama nchi hatuwezi kupiga hatua kwenye soka kama tutaendelea kuwa na viwanja ambavyo havina viwango vinavyotakikana
Pamoja na changamoto iliyopo, nyota wengi wa kigeni wanaokuja kucheza hapa nchini wanakuwa wameiva kulinganisha na wachezaji wazawa wengi
Mkazo zaidi unaweza kuwekwa kwenye utaratibu wa kuwapata nyota hao, tunaweza kuongeza masharti kwa wachezaji wanaosajiliwa bila ya kupunguza idadi
Mfano ni pendekezo lililotolewa la kutaka wachezaji wa kigeni wanaosajiliwa hapa nchini wawe wanacheza timu za Mataifa yao
Wachezaji wa aina hii wengi wanakuwa bora hivyo hata gharama za kuwapata zinakuwa ziko juu
Ukiwa na sheria kama hiyo ni vilabu vyenyewe vitakavyoamua ni wachezaji wangapi wanaweza kuwasajili na pengine idadi inaweza kuwa hata chini ya hao 10 waliopo sasa
