Mtendaji Mkuu wa Bodi ya Ligi Almas Kasongo amesema wamewasilisha mapendekezo yao Serikalini katika mpango wa kurejea kwa ligi kuu ya Vodacom
Kasongo amesema wamependekeza ligi irejee katika ya mwezi Juni huku wakiweka utaratibu ambao utahakikisha wahusika wote wa mechi kuanzia wachezaji, benchi la ufundi, maafisa wa mchezo na waandishi wa habari wanafanyiwa vipimo vya corona kabla ya mchezo
Kasongo amesema wanasubiri majibu ya Serikali hivyo kwa sasa ni vyema timu zikaendelea kufuata maelekezo ya Serikali kuhusiana na udhibiti wa ugonjwa wa corona
Baada ya kauli ya Rais Dk John Magufuli ambaye wiki iliyopita alidokeza kusudio lake la kuruhusu ligi hiyo kuchezwa katika mazingira salama, timu karibu zote zimeongeza mkazo kwa wachezaji wao kufanya mazoezi
"Tumependekeza utaratibu salama ambapo tutahakikisha wahusika wote wa kila mchezo wanafanyiwa vipimo vya corona. Hapa nazungumzia wachezaji, maafisa wa benchi la ufundi, maafisa wa mchezo na waandishi wa habari"
"Ni kusudio letu kuhakikisha mechi zote zinachezwa katika mazingira salama. Tunasubiri kusikia upande wa Serikali wanasemaje hivyo ni vyema timu zikaendelea kufuata maelekezo yanayotolewa, hakuna ruhusa iliyotolewa kwa timu kufanya mazoezi ya pamoja"
"Pale Serikali itakapoturuhusu, tutapanga ratiba ya muda wa mazoezi na wakati wa kuanza mechi zenyewe"
