Kama ligi itarejea mapema klabu ya Yanga huenda ikakosa huduma ya kocha wake Luc Eymael ambaye bado amekwama Ubelgiji kutokana na changamoto za usafiri zilizosababishwa na ugonjwa wa corona
Hata hivyo hilo haliwezi kuwa tatizo kwani mabingwa hao wa kihistoria wanae kocha wao msaidizi Charles Mkwasa ambaye alikuwa akiinoa timu hiyo kabla ya Eymael kutua mwezi Januari
Msemaji wa klabu ya Yanga Antonio Nugaz amesema hakutakuwa na changamoto yoyote kama ikitokea Eymael atachelewa kurudi nchini kwa kuwa yupo Mkwasa
"Ligi hata ikirejea kesho timu itakuwa chini ya kocha Mkwasa na hakutakuwa na tofauti yoyote kwakua ana uwezo mkubwa na ana uzoefu huku akiifahamu vizuri Yanga hivyo hakutakuwa na upungufu kwenye benchi la ufundi," alisema Nugaz
Hivi karibuni Rais wa Jamhuri ya Muungano wa Tanzania Mh Dk John Magufuli alidokeza kuwa anafikiria kuruhusu ligi kuendelea baada ya kushauriana na wataalam wake wa afya
