Aliyekuwa kocha mkuu wa Yanga Mwinyi Zahera alisajili idadi kubwa ya wachezaji kwenye nafasi ya ulinzi, hasa walinzi wa kati, lakini kocha wa sasa Luc Eymael amependekeza usajili wa mlinzi mwingine wa kati
Walinzi waliosajiliwa wakati wa Zahera ni Lamine Moro, Mustafa Selemani, Ally Mtoni na Ally Ally na wakati huohuo Yanga ikiwa na Kelvin Yondani na Andrew Vicent ambaye alirejeshwa kikosini baada ya GSM kumaliza sakata lake la madai dhidi ya uongozi wa Yanga
Mustafa yeye mkataba wake ulivunjwa mwezi Januari wakati Ally Ally alitolewa kwa mkopo lakini akagoma kwa kuwa timu aliyopelekwa sio timu ambayo mwenyewe alipendekeza
Kati ya walinzi waliopo, Eymael ameonekana kumkubali zaidi Lamine Moro huku akieleza kuridhishwa na uwezo wa mkongwe Yondani ambaye hata hivyo makali yake yanapungua kutokana na umri wake unazidi kumtupa mkono. Ifikapo Oktoba 09 Yondani atakuwa na miaka 36
Mbelgiji huyo alilazimika kumtumia Said Juma Makapu nafasi ya mlinzi wa kati ambapo kwa kiasi kikubwa alifanya vizuri kuliko wengi walivyotarajia
Eymael anataka mlinzi mwingine wa kati ambaye atashirikiana na Lamine, Makapu, Mtoni na pengine Yondani kwa kuwa Chikupe huenda asiwe sehemu ya kikosi cha Yanga pale mkataba wake utakapomalizika mwishoni mwa msimu
Tangu Eymael alipotua Yanga mwezi Januari, Chikupe hakuwahi kupata nafasi ya kucheza. Mchezo pekee aliocheza tangu arejee Yanga baada ya mgogoro wake kumalizika ni mchezo wa kwanza dhidi ya Simba ambao ulimalizika kwa sare ya mabao 2-2
Mlinzi na nahodha wa Nkana Fc, ambaye pia hucheza timu ya Taifa ya Kenya Mussa Mohammed alifichua kuwa kwenye mazungumzo na mabosi wa Yanga ambao wanataka huduma yake
Lakini pia inaelezwa Yanga inakaribia kumnasa mlinzi wa Coastal Union, Bakari Nondo Mwamnyeto ikielezwa kuwa mazungumzo baina ya Yanga na Coastal yamefika pazuri na kilichokuwa kinasubiriwa ni makubaliano binafsi na mchezaji
Kama Yanga itafanikiwa kumpata mmoja au hata walinzi wote, Eymael atakuwa amemaliza changamoto kwenye safu yake ya ulinzi ambayo msimu huu imeruhusu mabao 20 huku safu ya ushambuliaji ikifunga mabao 31 tu
