Afisa Mhamasishaji wa klabu ya Yanga Antonio Nugaz amesema anaamini nchi za Afrika ikiwemo Tanzania haziwezi kukwepa matumizi ya teknolojia ya VAR katika ligi zao
VAR ilianza kutumika kwa mara ya kwanza kwenye michuano ya kombe la dunia mwaka 2018 na sasa ligi karibu zote barani Ulaya zinatumia teknolojia hiyo kuwasaidia waamuzi
Barani Afrika nchi ya Morocco tayari imeanza kutumia kwenye ligi yao huku Shirikisho la soka barani Afrika (CAF) likitumia teknolojia hiyo kwenye michuano ya ligi ya mabingwa na kombe la Shirikisho kuanzia hatua ya nusu fainali
Nugaz amesema kama VAR italetwa Tanzania basi itaondoa yale 'makandokando' mengi yanayoonekana katika ligi yetu
"Kama imeanza kutumika barani ulaya, nadhani na sisi Afrika ni wakati wetu kuangalia matumizi ya teknolojia hiyo. VAR itasaidia kutenda haki na kuondoa uonevu kutokana maamuzi yasiyo sahihi. Hapa kwetu itaondoa yale makandokando mengi ambayo yanaonekana kwenye ligi yetu," amesema
Msimu huu malalamiko mengi yameelekezwa kwa waamuzi ambao wengi wameonekana kushindwa kuzitafsiri kwa usahihi sheria 17 za mchezo wa soka
