Kiungo fundi wa Yanga Feisal Salum 'Fei Toto' amesema klabu ya Smouha Fc inayoshiriki ligi kuu ya Misri iliyokuwa ikimtaka akafanye majaribio, haikuwa imewasiliana na yeye moja kwa moja
Smouha iliwataka Fei Toto na Ditram Nchimbi waende kufanya majaribio kabla ya kocha mkuu wa Yanga Luc Eymael kugomea wachezaji hao kuondoka wakati timu ikikabiliwa na mechi muhimu
"Smouha hawakuwasiliana na mimi moja kwa moja, waliwasilian na viongozi wa Yanga, maamuzi yalifanyika kwenye ngazi ya uongozi, " amesema
Hata hivyo Fei Toto amefichua kuwa bado ana ndoto ya kwenda kucheza soka nje ya nchi, anaamini ataondoka wakati wake ukifika
"Natamani sana kwenda kucheza soka nje ya nchi, hiyo ni ndoto yangu ya muda mrefu naamini siku moja nitafanikiwa"
"Sasa nina nafasi nzuri zaidi ya kukamilisha ndoto hiyo hapa Yanga kwani naonekana zaidi kuliko nilipokuwa nikicheza Zanzibar," amesema
Fei Toto alianza msimu kwa kusuasua lakini alirejea kwenye kikosi cha kwanza kwa kishindo kwenye mechi nne mfululizo kabla ya Serikali kuchukua hatua ya kusimamisha ligi kutokana na changamoto ya ugonjwa wa corona
Kwa sasa yuko visiwani Zanzibar akiaendelea kufanya mazoezi binafsi
