Kiungo wa Yanga Haruna Niyonzima amesema kikosi cha timu hiyo kina wachezaji wengi wazuri lakini watahitaji muda ili kuzoeana
Nahodha huyo wa timu ya Taifa ya Rwanda, amesema wanahitaji kucheza pamoja kwa muda ili watengeneza muunganiko mzuri
Niyonzima amekumbushia kikosi kilichotwaa taji la ligi kuu kwa misimu mitatu mfululizo kuanzia mwaka 2014 mpaka 2017 kuwa walicheza pamoja kwa muda mrefu na hivyo kuzoeana
"Yanga tulichukua kikombe cha Ligi Kuu Bara mara tatu mfululizo, sio kama tulikuwa na kikosi hatari sana, lakini tulizoeana, mchezaji unajua ukipeleka mpira hapa, utamkuta mwenzako, huwezi kupata mafanikio haraka haraka," amesema
Niyonzima aliyerejea Yanga usajili wa dirisha dogo akitokea AS Kigali ya kwao Rwanda, amesema uamuzi wa kurejea kwa mabingwa hao wa kihistoria haukuangalia maslahi zaidi bali ni kwa sababu ndio timu anayoiheshimu zaidi nchini
"Nimerudi Yanga kwa sababu ndio timu ninayoiheshimu na ni timu ninayoifurahia, ni kweli tunaangalia maslahi, lakini lazima uwe na sababu zako binafsi, kwa hisia zangu binafsi ndio zilipelekea kukubali kurejea"
Niyonzima amesema alipata nafasi ya kucheza Simba kwa misimu miwili lakini hakupata mafanikio kutokana na changamoto ya majeruhi ya mara kwa mara. Hata hivyo amesema hafikirii tena kama iko siku atarejea kuitumikia timu hiyo
"Siku zote tunaishi kwa kumtegemea Mungu. Nilimuomba mungu niweze kurudi Yanga, na namuomba mungu anisaidie ili nizidi kufanya vizuri hapa. Sidhani kama itatokea siku nitarudi kuichezea Simba"
