Mwenyekiti wa kamati ya usajili Yanga Dominic Albanus amesema ni vyema mashabiki wakasubiri dirisha la usajili litakapofunguliwa kufahamu nyota watakaosajiliwa
Kwa siku za karibuni idadi kubwa ya wachezaji wamehusishwa na Yanga
Dominic amesema mpaka sasa Yanga imehusishwa kutaka kuwasajili zaidi ya wachezaji 30 jambo ambalo kiuhalisia haliwezekani
"Mimi sijui hizi taarifa zinatoka wapi kwa sababu kama timu bado hatujaanza michakato ya usajili kwa sababu dirisha la usajili bado halijafunguliwa," amesema
"Inawezekana kutokana na janga la corona, shughuli zote za michezo zimesitishwa hivyo waandishi wa habari wanalazimika kutengeneza habari"
Dominic ametoa kauli hiyo baada ya kuibuka kwa tetesi kuwa Yanga imeanza mawasiliano na beki wa zamani wa Simba Juuko Murshidi kwa ajili ya kumsajili
"Hatujawahi kuwasiliana na Juuko, kwanza hatufahamu hata alipo. Kwa kweli tunashangaa habari hizi zinatokea wapi?"
Dominic amesema dirisha la usajili litakapofunguliwa watahakikisha wanaunda kikosi imara kwa kufuata mapendekezo ya kocha Luc Eymael
"Tumedhamiria kuunda kikosi imara kwa ajili ya msimu ujao tuweze kurejesha utamaduni wa kushinda mataji. Mashabiki wetu wawe na subira, tunawahakikishia yajayo yanafurahisha..!"
