Huo upepo wa GSM unavuma kila pembe ukanda huu wa Afrika Mashariki hali inayowafanya wachezaji kutamani kujumuishwa kwenye 'project' ya kuijenga Yanga inayofanywa na matajiri hao walioapa kutengeneza kikosi cha maangamizi
Kiungo mshambuliaji wa Kariobang Sharks, Sven Yidah imeeleza kutamani kujiunga na mabingwa hao wa kihistoria
Yidar ni miongoni mwa wachezaji ambao tetesi ziliwahusisha kujiunga na Yanga mapema tu lakini kocha Luc Eymael akakanusha kumfuatilia nyota huyo
Kiungo huyo ameeleza kuvutiwa na ligi ya Tanzania hasa Yanga ambayo ameifahamu kupitia historia yake na mechi mbili alizocheza nayo kwenye michuano ya Sportpesa na kilele cha wiki ya Mwananchi kabla ya msimu huu kuanza
"Ligi ya Tanzania ina msisimko kuliko huku Kenya. Naifahamu Yanga ni klabu yenye historia kubwa, nimecheza nao mara mbili. Kama wakinitaka na tukafikia makubaliano niko tayari kujiunga nao. Pale Yanga nitafutahi kucheza na yule nahodha wao (Tshishimbi) na Fei Toto," alisema
Hata hivyo kocha Eymael ameeleza kutomfahamu kiungo huyo huku akibainisha sio miongoni mwa wachezaji aliopendekeza wasajiliwe na timu yake
"Huyo mchezaji simfahamu, labda nipate nafasi ya kumfuatilia lakini siwezi kupendekeza mchezaji nisiyemfahamu," amesema
"Kabla sijaondoka Tanzania, nilipendekeza orodha ya majina tofauti, mchezaji mmoja au wawili kutoka Rwanda, mmoja kutoka Ubelgiji na mwingine kutoka Burundi. Pia mchezaji mmoja au wawili kutoka Misri na mmoja kutoka Ghana"
Inaelezwa Yanga iko karibu kumsaini kiungo kutoka klabu ya Rayon Sport ya nchini Rwanda, Ally Niyonzima
