Katika kuhakikisha wanasajili wachezaji wa kigeni ambao watakuwa na uhakika wa kuisaidia timu kufikia malengo yake, kipaumbele cha kwanza kwa mchezaji anayepaswa kusajiliwa na Yanga ni lazima awe anacheza timu ya Taifa, imefahamika
Yanga pia imeweka mkazo kwa kigezo hicho ili kwendana na matakwa ya Shirikisho la soka nchini (TFF) ambalo inaelezwa kuanzia msimu ujao litavibana vilabu kuhakikisha vinasajili wachezaji wa kigeni ambao wana hadhi na wanacheza timu za Taifa
Lakini pia Yanga haitasajili mchezaji ambaye katika timu aliyokuwa akicheza hakuwa na nafasi kwenye kikosi cha kwanza
Kigezo hicho pia inaelezwa kitawahusu wachezaji wazawa ambao wanawaniwa na timu hiyo
Mmoja wa viongozi waandamizi wa Yanga amesema wanafahamu kusajili wachezaji wa kigeni ambao wanacheza timu za Taifa itawagharimu fedha zaidi lakini wadhamini wao kampuni ya GSM wamewaruhusu kutekeleza mpango huo
"Msimu huu tumepata hasara kwa kusajili wachezaji wengi wa kigeni kiholela. Hatutarudia makosa ndio maana tumeongeza umakini kwenye usajili unaokuja.. Ni bora tutumie Milioni 300 kusajili mchezaji mmoja mzuri kuliko kusajili wachezaji watano ambao hawana mchango mkubwa kwa timu," alisema
