Sare ni matokeo 'rafiki' kwa Pluijm na Lwandamina

Mchezo dhidi ya Singida United ulikuwa mgumu kama ilivyotarajiwa. Matokeo ya sare ni matokeo 'rafiki' kwa timu zote.

Singida United ilikamia mchezo huo na walikuwa na sababu ya kukamia.

Ikumbukwe mchezo huo umeweka historia kwa klabu ya Singida United kucheza kwa mara ya kwanza kwenye uwanja wake wa nyumbani baada ya miaka 5 kupita ambapo mara ya mwisho ilikuwa ni mwaka 2012.

Katika mechi za raundi 8 zilizopita msimu huu Singida United ilikuwa ikitumia uwanja wa Jamhuri Dodoma ambapo Namfua ulikuwa unafanyiwa marekebisho kabla ya Bodi ya ligi kuupitisha rasmi uwanja huo mapema mwezi uliopita.

Hivyo Singida United ilitamani sana kupata ushindi dhidi ya mabingwa ili kuiandika Historia yao vizuri.

Hans van Pluijm na George Lwandamina ni sababu nyingine ya mchezo huo kuwa na ushindani wa hali ya juu.

Inafahamika Pluijm ndiye aliyempisha Lwandamina yeye akipewa cheo cha Ukurugenzi wa Ufundi, cheo ambacho kilifutwa na Pluijm kupoteza ajira baada ya Yanga kukumbwa na 'ukata'.

Pluijm ni 'master' wa soka la kushambulia hilo halina ubishi. Singida United ni moja ya timu bora kabisa msimu huu.

Timu hii iko katika daraja sawa sawa na Yanga, Simba, Azam FC na Mtibwa katika mbio za ubingwa.

Ni dhahiri Pluijm leo alihitaji zaidi ushindi ili apeleke 'salamu' kwa viongozi wa Yanga.

Hata hivyo Lwandamina ni 'master' wa soka la kujilinda. Yanga msimu huu inajivunia safu imara ya ulinzi.

Mfumo unaotumiwa na Lwandamina wa kujilinda pamoja na kushambulia kwa pamoja umeifanya Yanga kuwa timu ngumu kufungika.

Msimu huu upo uwezekano wa kutopoteza mchezo kama wachezaji wataendelea kujituma kwenye ulinzi kama wanavyofanya sasa.