Kwa misimu mitatu iliyopita klabu ya Simba ilitawala zaidi kwenye soko la usajili, fedha za Bilionea Mohammed Dewji 'Mo' zikiwapa kiburi mabingwa hao watetezi ligi kuu
Kabla ya hapo ni Yanga iliyokuwa ikisumbua wakati wa Mwenyekiti Yusufu Manji ambaye alitumia mamilioni kukisuka kikosi cha mabingwa hao wa kihistoria
Ukiangalia usajili uliofanywa na Simba ndani ya misimu mitatu iliyopita, nyota wengi waliokuwa wakinyemelewa na Yanga walisajiliwa kibabe na timu hiyo kutokana na jeuri ya fedha
Utaratibu huo ulianza kushika mizizi kwani klabu hiyo pia ilisajili moja kwa moja wachezaji kutoka klabu ya Yanga
Ni msimu huu huu mwanzoni Simba ilisajili nyota watatu muhimu wa Yanga Beno Kakolanya, Gadiel Michael na Ibrahim Ajib aliyekuwa kipenzi cha mashabiki
Usajili wa Gadiel ulifanyika siku mbili kabla ya dirisha la usajili kufungwa, nyota huyo akirudisha mkataba wa Yanga aliokuwa amekabidhiwa kabla ya kwenda kushiriki michuano ya Afcon nchini Misri
Lakini tangu GSM waanze kuidhamini Yanga mwezi Januari, heshima ya mabingwa hao wa kihistoria kwenye usajili imeanza kurejea
GSM waliingia wakati ambao nyota wengi wakigeni walikuwa wakivunja mikataba yao baada ya kukosa mishahara kwa zaidi ya miezi mitatu
GSM walifanikiwa kumrejesha beki Lamine Moro ambaye alikuwa tayari amerejea kwao Ghana
Lakini pia wakaweza kuwasajili Haruna Niyonzima, Barnard Morrison, Adeyum Saleh, Erick Kabamba na Yikpe Gnamien
GSM wameendelea kuipa Yanga heshima baada ya kuzima jaribio la klabu ya Simba kuwasajili Morrison na Papy Tshishimbi ambao mikataba yao ilikuwa ikielekea ukingoni
Pengine wachezaji hao ndio wameziiingiza timu hizo kwenye vita ya usajili inayoonekana sasa
Kwani GSM wamepanga kulipa kisasi kwa kusajili nyota wa Simba ambao mikataba yao iko mbioni kumalizika
Nyota wanaotajwa kuwa kwenye rada za GSM ni pamoja na Clatous Chama ambaye klabu ya Simba kupitia msemaji wao wametishia kwenda kushitaki FIFA wakiituhumu Yanga kuanza mazungumzo mapema na nyota huyo ambaye wanadai mkataba wake ni zaidi ya miezi sita
Lakini GSM wamekwenda mbali zaidi wakiitaka Simba iweke hadharani dau wanalotaka kwa ajili ya nyota huyo
Nyota wengine wanaohusishwa kwenye mpango wa GSM ni mawinga Deo Kanda na Hassan Dilunga ambao mikataba yao iko mbioni kumalizika
Aidha kwa Kanda, Yanga inapaswa kumalizana na TP Mazembe ambayo ndio inayommiliki mchezaji huyo
Kwa kasi waliyorejea nayo GSM, ni wazi imepeleka hofu pale Msimbazi kwani wanaonekana kuwa na shauku ya kurejesha heshima ya Yanga kwa soka la Tanzania
