Jana Mkurugenzi wa Uwekezaji kampuni ya GSM Mhandisi Hersi Said alibainisha kuwa juu ya mkataba wa kutengeneza na kusambaza jezi za klabu ya Yanga, wamesaini mkataba mwingine na uongozi wa Yanga kwa ajili ya kutengeneza bidhaa nyingine za klabu hiyo
Mkataba huo wa mwaka mmoja, utawawezesha kutumia nembo ya Yanga kutengeneza bidhaa nyingine kwa niaba ya mabingwa hao wa kihistoria
Bidhaa hizo ni pamoja na skafu, bangili, fulana za kike na za kiume kuanzia za vijana wadogo hadi watu wazima, viatu, vikombe na vitu vingine mbalimbali
Hersi alisema kuwa Yanga itanufaika kwa kujiongezea mapato kutokana na mradi huo
Hii ni habari njema kwa Yanga ambayo kwa muda mrefu imekuwa na ndoto ya kuzalisha bidhaa hizo kwa ajili ya mashabiki wake
Huu ndio mwanzo wa Yanga ya kisasa, kwani wakati mchakato wa mabadiliko ukiendelea, haya yanayofanyika yanaashiria neema huko mbeleni
Klabu zote kubwa duniani zina utaratibu huu, ni muhimu kunufaika na wingi wa mashabiki ambao timu inakuwa nao
