Mwenyekiti wa Yanga Dk Mshindo Msolla amesema uongozi wa timu hiyo umemaliza tofauti iliyojitokeza na wadhamini wao kampuni ya GSM
Akizungumza mapema leo katika Mkutano wa pamoja na GSM, Dk Msolla amesema GSM wataendelea na majukumu yao kama ilivyokuwa mwanzo
"Tunatambua na kuthamini mchango ambao wenzetu GSM wamekuwa wakitoa kwa klabu yetu. Baada ya changamoto iliyojitokeza siku chache zilizopita, sisi kama uongozi wa Yanga tulichukua hatua kwa mujibu wa taratibu zetu na baadae tuliomba kukutana na wenzetu GSM"
"Nashukuru kikao chetu killikwenda vizuri na leo tunatangaza rasmi kuwa GSM wataendelea na majukumu yao. Wataendelea kutimiza wajibu wao kulingana na mkataba tulioingia nao. Lakini pia wataendelea kufanya yale waliyokuwa wakiyafanya ambayo sio sehemu ya mkataba," alisema Dk Msolla
Naye Mkurugenzi wa uwekezaji GSM Mhandisi Hersi Said amesema wao ni wanafamilia wa Yanga hivyo wataendelea na yale yote waliyokuwa wakiyafanya lengo likiwa kuhakikisha wanaitoa Yanga hapa ilipo
Mhandisi Hersi amesema wataendelea kushirikiana na uongozi wa Yanga pamoja na Mwanayanga yeyote mwenye mapenzi mema na klabu hiyo
Amesema sehemu kubwa ya kazi wanayoifanya kwa Yanga wanajitolea kwa sababu wanaipenda Yanga
Amewakaribisha wadau wengine wote ambao wangependa kuiona Yanga inasonga mbele waungane nao
Hersi amesema baada ya kukosa ubingwa kwa misimu mitatu, amewataka wanayanga kuweka malengo ya kutwaa ubingwa msimu ujao
Amesema Yanga inatarajiwa kuwa na mabadiliko makubwa ikiwemo kusajili wachezaji wapya ambao wataweza kutimiza azma hiyo ya kushinda ubingwa msimu ujao
"Hili nataka niliingie vichwani mwa Wanayanga wote. Baada ya kukosa ubingwa kwa misimu mitatu, msimu ujao ni zamu yetu kutwaa ubingwa. Tunaanza mikakati mapema kwa kuboresha timu yetu ikiwemo kusajili wachezaji wenye uwezo na kuwatengenezea mazingira mazuri wachezaji ambao tutaendelea kubaki nao"
