Dakika 847 za michezo ya kimataifa alizocheza winga Mkongo wa AS Vita, Tuisila Kisinda, zimeonekana kuwashawishi vilivyo Yanga ambayo imeonyesha nia ya kumsajili msimu ujao.
Yanga kwa sasa inataka kuhakikisha inafanya usajili wa wachezaji wazuri wa kimataifa kwa ajili ya kukiboresha kikosi chao haswa katika eneo la ushambuliaji ambapo kumekuwa na idadi ndogo ya mabao msimu huu.
Kisinda akiwa na AS Vita katika michezo ya Ligi ya Mabingwa Afrika na Kombe la Shirikisho Afrika msimu huu, amefanikiwa kucheza michezo 13, huku akifunga bao moja na kutoa pasi tatu za mabao.
Winga huyo katika mechi hizo, hakufanikiwa kucheza kwa dakika zote na kuishia dakika 847, kama angecheza zote, zingekuwa 1170.
Kisinda mwenye umri wa miaka 20, katika michezo ya ligi ya mabingwa pekee amecheza michezo 11 kwa dakika 749, huku katika Kombe la Shirikisho akicheza michezo miwili kwa dakika 98 ambazo jumla ni 847
Jina la Kisinda limeibukia kwenye usajili wa Yanga hivi karibuni baada ya kuelezwa nyota huyo ni miongoni mwa mapendekezo yaliyoachwa na kocha Luc Eymael
Wadhamini wa Yanga kampuni ya GSM inaelezwa tayari wametuma mwakilishi wake DR Congo kuangalia uwezekano wa kumnasa kinda huyo huku pia ikielezwa bosi huyo amekwenda kumalizana na mshambuliaji wa zamani wa timu hiyo Heritier Makambo ambaye upo mchakato wa kumrejesha Yanga kutoka klabu ya Horoya AC
Hata hivyo ili kumnasa Makambo, Yanga inapaswa kwenda kumalizana na Horoya kwanza kwani nyota huyo bado ana mkataba wa miaka miwili na miamba hao wa Guinea
Taarifa za ndani zinadai kuwa GSM wamedhamiria kumrejesha nyota huyo wakiwa tayari kuvunja mkataba wake na Horoya
