Zipo tetesi zinazoihusisha klabu ya Yanga kumuwania beki, nahodha wa Coastal Union Bakari Nondo Mwamnyeto ambaye amekuwa na kiwango bora msimu huu
Inafahamika, kwenye usajili wa dirisha dogo Yanga ilijaribu kumsajili Mwamnyeto lakini wakaachana nae baada ya Coastal Union kutaka dau kubwa
Wapo wanaodhani Yanga itafanya uamuzi sahihi kama itaweza kumsajili beki huyo wa timu ya Taifa kuchukua nafasi ya mkongwe Kelvin Yondani ambaye muda wake wa kuendelea kusakata kabumbu unaelekea ukingoni
Hata hivyo ukiiangalia safu ya ulinzi ya Yanga, ina walinzi wa kati wenye uwezo wa kuziba vyema nafasi ya Yondani
Hakuna aliyedhani kiraka Said Juma Makapu angefikia mafanikio aliyoyapata na kuwa mlinzi wa kutegemewa kwenye kikosi cha Yanga
Makapu alibadilishiwa majukumu kutoka nafasi ya kiungo mkabaji na kocha Luc Eymael baada ya kuvutiwa na aina ya uchezaji pamoja na umbo lake (urefu)
Ukimuondoa Lamine Moro, Yanga pia inao Andrew Vicent, Ally Mtoni na Ally Ally ambaye aligomea kutolewa kwa mkopo mwezi Januari
Walinzi wote wana umri chini ya miaka 27 hivyo Yanga inaweza ikawatumia kwa muda mrefu wakiwa na viwango bora
Hata hivyo Mwamnyeto ni mmoja wa walinzi bora Tanzania kwa sasa, akiwa na umri mdogo, tayari ameshapata uzoefu wa mikiki mikiki ya soka la Kimataifa
Inaeleza Yondani mwenyewe ndiye aliyependekeza Yanga imsajili kinda huyo mwenye umri wa miaka 22 akiamini anaweza kutumika kwa muda mrefu kama ilivyokuwa kwake
