Mshambuliaji wa zamani wa Yanga Hamis Kiiza ambaye aliwahi kutamba kwenye kikosi cha mabingwa hao wa kihistoria kati ya mwaka 2010 na 2014, amesema anatamani kurejea Tanzania kuitumikia tena Yanga
Kiiza aliyeichezea Yanga kwa misimu mitatu alifanikiwa kufunga mabao 56, kwa sasa anaitumikia klabu ya Proline Fc ya huko Uganda
Msimu wa 2016/17, Kiiza aliitumikia Simba kwa msimu mmoja lakini amesema katika timu tisa ambazo amezitumikia, anaikumbuka zaidi klabu ya Yanga
Nyota huyo mwenye umri wa miaka 30, amesema bado yuko fiti na anatamani siku moja arejee Tanzania aitumikie tena Yanga
"Nimecheza katika timu tisa tangu nianze soka la ushindani, lakini kote huko siwezi kuisahau Yanga ambayo ndio iliyonifanya nitambulike sehemu kubwa duniani," amesema Kiiza
"Bado nacheza mpira, sina mpango wa kustaafu hivi karibuni mipango yangu siku moja nirudi Tanzania kucheza timu ya Yanga kutokana na sababu mbalimbali, kubwa ni jinsi wanavyothamini wachezaji wao katika hali zote"
Kiiza ni mmoja wa washambuliaji wa kigeni ambao walikubalika sana na mashabiki wakati wakiitumikia Yanga
Hata hivyo kwa sasa haonekani kuwa na nafasi ya kusajiliwa na mabingwa hao wa kihistoria ambao wako kwenye mchakato wa kuiimarisha timu yao kwa ajili ya msimu ujao
