Kiungo wa Yanga, Feisal Salum ‘Fei Toto’ amesema hana wasiwasi na kiwango chake ligi itakapoanza atakuwa bora zaidi.
Fei Toto amesema akicheza anakuwa anajisikia burudani kwa kuwa anapenda soka ndio jambo linalomwaminisha hatayumba kiuwezo.
"Kipaji cha mtu hakiwezi kuyumbishwa kwa namna yoyote ile labda aumwe, ugonjwa wa corona tunaambiwa namna ya kujikinga hivyo hauwezi kuzuia kufanya mazoezi."
"Siwezi kujisikia raha bila kufanya mazoezi kwa sababu nakuwa nahisi kama napungukiwa, kikubwa ni mchezaji mmoja mmoja kujitambua basi," amesema Fei Toto.
Fei Toto amesisitiza anaendelea kufanya mazoezi ya gym na kukimbia kuhakikisha akirejea kazi anakuwa katika kiwango cha juu
Baada ya kukosekana kikosi kwa muda, Fei Toto amerejea akiwa kamili akipata nafasi ya kuanza katika mechi nne mfululizo
Ubora ulioonyesha katika mechi hizo ulimfanya arudishwe kikosi cha timu ya Taifa ambacho kilikuwa kikijiandaa na michuano ya CHAN kabla ya kambi kuvunjwa kutokana na changamoto ya virusi vya COVID-19
