Kabla ya mchezo dhidi ya Namungo Fc, Kocha Mkuu wa Yanga Luc Eymael alitoa malalamiko kwa baadhi ya wachezaji wa timu hiyo hawaipi heshima nembo ya Yanga vile inavyopaswa
Alichukizwa na kitendo cha baadhi ya nyota kugoma kusafiri na timu mkoani Lindi akikifananisha kitendo hicho na usaliti kwa klabu
Mbelgiji huyo alibainisha kuwa katika maisha yake ya ukocha hakuwahi kukutana na kitu kama hiki, akieleza kushangazwa na utamaduni huu wa wachezaji kuchagua mechi
Sasa jana uongozi wa Yanga ulitarajia kukutana nae ambapo pamoja na mambo mengine, ni kujadili matukio hayo ya utovu wa nidhamu
Huenda mabadiliko mengine makubwa ya kikosi yakashuhudiwa mwishoni mwa msimu kwani Mbelgiji huyo amepewa rungu kubadili mambo kadhaa pale Jangwani
Wachezaji watovu wa nidhamu hawatakuwa na nafasi kwenye kikosi chake msimu ujao huku ikielezwa pia GSM wamempa ruhusa kusaka wachezaji ambao anadhani wataisaidia Yanga kulingana na mapungufu yaliyopo
Katika moja ya mahojiano yake hivi karibuni, Eymael alieleza kuwa kama angejiunga na Yanga mapema kabla ya dirisha dogo la usajili kufungwa, angesajili wachezaji watatu
Lakini alifanikiwa kumsajili mchezaji mmoja tu Bernard Morrison huku akitamba kuwa msimu ukimalizika atasajili nyota wengine ambao anawafahamu ni hatari zaidi ya Morrison
