Leo ni March 08, ni siku ambayo ule mchezo uliokuwa ukisubiriwa kwa hamu, watani wa jadi Yanga na Simba watakuwa uwanjani kuwapa burudani mashabiki pamoja na kusaka alama tatu muhimu
Huu ni mchezo wa heshima zaidi kwa Yanga wakati upande wa Simba pengine wakipata ushindi wanaweza kuwa na uhakika wa kutawazwa mabingwa kwa msimu wa tatu mfululizo
Ukiwauliza mashabiki 10 wa Simba kuhusu utabiri wa mchezo huu, 9 wataipa ushindi timu yao, lakini ukweli ni kwamba mechi hii itakuwa ngumu sana, kuingia uwanjani na matokeo mfukoni ni hatari
Miaka michache iliyopita mwamuzi akiwa huyu huyu Martin Saanya ambaye atashika kipenga leo, mashabiki hao walin'goa viti uwanjani baada ya mambo kwenda kinyume na walivyokuwa wakidhani yatakuwa
Ni mchezo ambao kisaikolojia Yanga wataingia wakiwa imara sana. Achana na ahadi ya fedha zaidi ya Milioni 300 ambazo wachezaji watapata kama wataifunga Simba, lakini pia wachezaji wenyewe bila hata hizo ahadi wameupania kwelikweli mchezo huu
Baadhi ya nyota wa timu hiyo wamesema siku ya leo hawatakubali kupoteza mchezo dhidi ya Simba, wako tayari kufia uwanjani lakini watapambana kuhakikisha wanaondoka na alama zote tatu
Lakini pia Yanga sasa iko imara kuliko ilivyokuwa siku za nyuma. Wengi wanatumia kigezo cha kutoka sare nne mfululizo kudhani timu hiyo ni dhaifu, wanajidanganya
Kocha Luc Eymael amefanyia kazi baadhi ya changamoto zilizokuwa zikipelekea timu yake haifungi mabao, ndio maana katika michezo mitatu iliyopita wamefunga mabao matano huku ukuta wao ukiwa haujaruhusu hata bao moja
Kimbinu Eymael yuko vizuri, anafahamu namna atakavyowadhibiti Simba, mwenyewe amewaambia wale ambao hawaipi nafasi timu yake, hawataamini watakachokishuhudia
Eymael hakuwepo kwenye mchezo wa kwanza uliomalizika kwa sare ya mabao 2-2 lakini baada ya kupitia mkanda wa video wa mchezo huo, akabainisha kuwa angekuwepo Januari 04 Yanga wangeondoka na alama zote tatu
Mechi za dabi mara nyingi matokeo yake huamuliwa baada ya dakika 90 kwa sababu zina mambo mengi ya nje ya uwanja
Ni rahisi kwa shabiki kusema kuwa timu yake itashinda lakini ukweli ni kwamba kwenye dabi mambo hayako hivyo, dakika 90 zitaamua
