Kocha Mkuu wa Yanga Luc Eymael amesema changamoto ya timu yake kutofunga mabao katika mechi za hivi karibuni haisababishwi na mbinu anazotumia uwanjani
Tangu aanze kuinoa Yanga Eymael amekuwa akitumia mfumo 4-2-3-1 ambao anaweka viungo wengi katikati huku mbele akiweka mshambuliaji mmoja
Jana kwenye mchezo dhidi ya Coastal Union, Eymael alianza na 4-4-2 lakini baadae akarejea kwenye mfumo wake wa siku zote
"Tulitumia 4-4-2 kwa dakika 20 lakini hatukupata kile tulichokuwa tunakihitaji. Mimi sipendelei sana mfumo huo lakini ilinibidi niutumie katika jitihada za kusaka matokeo," Eymael alisema baada ya mchezo dhidi ya Coastal Union uliopigwa uwanja wa Mkwakwani ambao ulimalizika kwa matokeo ya suluhu ya bila kufungana
Katika mchezo huo Eymael aliwaanzisha Ditram Nchimbi na Tariq Seif pamoja lakini baadae akampeleka Nchimbi pembeni na kumuacha Tariq akiwa mshambuliaji pekee
Yanga inarejea jijini Dar es salaam leo tayari kuwakabili Gwambina Fc kwenye mchezo wa kombe la FA raundi ya tano ambao utapigwa Jumatano, uwanja wa Taifa
