Kocha Mkuu wa Yanga Luc Eymael amesema wamefanyia kazi mapungufu yaliyojitokeza kwenye michezo iliyopita na wamejipanga kuhakikisha wanapata ushindi kwenye mchezo dhidi ya Coastal Union ambao utapigwa keshokutwa Jumapili
Eymael aliyetua Yanga mapema mwaka huu, atakuwa na kibarua cha kuhakikisha timu yake inaifunga Coastal Union ili kuondokana na matokeo ya sare waliyopata kwenye michezo mitatu iliyopita
Hata hivyo ana kazi ya kuinoa safu yake ya ushambuliaji ambayo kasi yake ya kupasia mipira nyavuni hairidhishi
Eymae amesema wamekuwa wakifanyia kazi mapungufu ya eneo hilo, hivyo keshokutwa mambo yanaweza kuwa mazuri
"Nimewaelekeza wachezaji wangu watumie nafasi ambazo tunatengeneza kufunga mabao. Kila mechi tunakuwa bora muda mwingi, tunatengeneza nafasi lakini kutotumia nafasi au kufunga mabao machache ni tatizo ambalo hutugharimu baadae"
"Ni kamawaida unapocheza na timu ambayo iko nyuma hasa kwa bao moja, kuna wakati presha itakuwa kubwa upande wako, lakini kama tunaweza kutumia nafasi na kufunga mabao mengi, tunajiweka salama," alisema Eymael baada ya mazoezi yaliyofanyika uwanja wa shule ya sekondari Popatlal jana
Bado ana imani na Molinga
Eymael amesema anaamini mshambuliaji wake kinara wa mabao David Molinga, atafunga mabao zaidi katika mechi zijazo
Molinga hakucheza mchezo uliopita dhidi ya Polisi Tanzania, ambao Mbelgiji huyo alianza na Tariq Seif na baadae kumuingiza Yikpe
Molinga ameifungia Yanga mabao saba mpaka sasa kwenye ligi
