Kocha wa Yanga, Luc Eymael amewachambua washambuliaji wake, David Molinga na Yikpe Gnamein kuwa ni wenyenye uchezaji tofauti wawapo uwanjani.
Eymael ameiongoza Yanga kuibuka na ushindi katika michezo miwili mfululizo, mmoja wa Ligi na mwingine wa Kombe la FA, alisema watu wamekuwa wakimbeza Yikpe, lakini kwake ni mshambuliaji mzuri.
“Kuna aina nyingi za washambuliaji, nadhani hapa imezoeleka kuonekana wakicheza washambuliaji wenye mambo mengi. Kazi ya mshambuliaji ni kufunga, tulimuingiza katika mchezo dhidi ya Tanzania Prisons, alifanya kazi,” Eymael amenukuliwa na Mwanaspoti.
Aliendelea kufafanua kwa kusema amekuwa akivutiwa na hesabu za mshambuliaji huyo katika kutafuta nafasi za kufunga.
“Hakuna mshambuliaji anayefundishwa kufunga, huwa ni uwezo wa mchezaji binafsi kwangu ni mfungaji mzuri.”
Eymael alisema aina ya uchezaji wa Molinga ni tofauti ni mshambuliaji mwenye uwezo wa kukaa na mpira mguuni, nguvu alizonazo zineweza kumsaidia kupita kwa wepesi katika msitu wa mabeki hata wakiwa watatu.
"Ana tabia ya upambanaji naamini ushirikiano wake na wachezaji wenzake unaweza kutusaidia kuwa na msimu mzuri. Hakuna mchezaji muhimu zaidi ya mwingine kila mchezaji amekuwa na nafasi yake"
Molinga ndiye kinara wa mabao Yanga akiwa amefunga magoli matano anayemfuatia ni Patrick Sibomana mwenye mabao manne.
Tangu amejiunga na Yanga, Yikpe ameifungia timu hiyo mabao mawili moja upande wa Ligi na lingine katika kombe la FA.
