Ligi Kuu ya Vodacom inaendelea leo kwa michezo miwili kupigwa ambapo mchezo wa mapema ni kati ya Polisi Tanzania dhidi ya Tanzania Prisons kisha kufuatiwa na mchezo kati ya Simba dhidi ya Namungo Fc
Lakini kinachoshangaza ni kuwa Yanga haitacheza mchezo wowote mpaka siku ya Jumapili watakapocheza na Mtibwa Sugar licha ya kuwa wana michezo miwili ya viporo
Kesho Mtibwa Sugar watacheza na Azam Fc na kisha watacheza na Yanga Jumapili!
Mabingwa hao wa kihistoria watakuwa wamepumzika wiki nzima baada ya mchezo wao wa kombe la Azam dhidi ya Tanzania Prisons ambao ulipigwa Jumapili iliyopita
Lakini pengine wangeweza kucheza angalau mchezo mmoja wa kiporo kabla ya Jumapili
Sidhani kama kuna sababu kuendelea kurundika michezo ya viporo kwa Yanga kwani baadae huenda ikasababisha ugumu wa ratiba na pengine watalazimika kucheza mfululizo
Pengine viongozi wa Yanga wanapaswa kuipigia kelele Bodi ya Ligi kuhakikishia wanawapangia mechi zao za viporo ili wazicheze sasa kujiepusha na changamoto ya ratiba ambayo huenda ikatokea baadae
Kwa siku za karibuni Yanga imekuwa kwenye kiwango kizuri, kucheza mechi wakati huu ingekuwa sahihi zaidi kuliko wanapokaa muda mrefu bila ya kucheza inaweza kuathiri 'form' yao
Kama viongozi wa Yanga hawataomba mechi hizo zipangiwe ratiba mapema, Bodi ya ligi itatafuta wakati wanaoona inafaa kuwapangia kucheza
Kwa sasa hakuna sababu kwa timu kutofautiana hadi michezo mitatu wakati hakuna timu inayoshiriki michuano ya Kimataifa
Kwani wakati Yanga wao wanasubiri kucheza Jumapili, wenzao Simba watakuwa wameshacheza mechi mbili, leo na Jumamosi hivyo kutakuwa na tofauti ya michezo mitatu kati yao
