Kocha Mkuu wa Yanga Luc Eymael amesema kikosi chake kimesheheni wachezaji wenye vipaji na kuwa kila mchezaji atapata nafasi ya kucheza
Mbelgiji huyo amesema kwenye timu yake hakuna aliyejihakikishia namba ya kudumu kwenye kikosi cha kwanza
Eymael alitoa kauli hiyo jana baada ya mchezo wa kombe la Azam kati ya Yanga dhidi ya Prisons ambao ulimalizika kwa ushindi wa mabao 2-0
Kwenye mchezo huo Mu Ivory Coast Yikpe Gnamien alipachika bao la pili wakati bao la kwanza likiwekwa kimiani na Bernard Morrison kwa mkwaju wa penati
Eymael alieleza kuvutiwa na Gnamien ambaye amefunga katika michezo miwili mfululizo akitokea benchi
"Yikpe ni mchezaji anayejituma, nafurahi anapoingia mara nyingi anafanya kile ninachomuelekeza. Anaingia kwenye mfumo taratibu, wakati ukifika ataanza kwenye kikosi cha kwanza," alisema Eymael
"Tuna wachezaji wengi wazuri, kila mchezaji ana nafasi kwenye timu yangu, muhimu ni kuhakikisha anajituma na kuonyesha ubora wake"
Baada ya ushindi wa kombe la FA, mchezo utakaofuata ni dhidi ya Mtibwa Sugar ambao utapigwa Februari mosi kwenye uwanja wa Uhuru
