Yanga leo imetakata uwanja wa LITI (zamani Namfua) mkoani Singida baada ya kuichapa Singida United mabao 3-1 kwenye mchezo wa ligi kuu
Vijana wa kocha Luc Eymael waliingia kwenye mchezo huo wakiwa na shauku ya kuondoka na alama zote tatu na hilo wamelitimiza kibabe kabisa
David Molinga alianza kuifungia Yanga bao la kuongoza kwenye dakika ya 12 akimalizia pasi murua ya Mapinduzi Balama
Mabingwa hao wa kihistoria walikwenda mapumziko wakiwa mbele kwa bao hilo moja
Bao la pili liliwekwa kimiani kwenye dakika ya 58 na Haruna Niyonzima aliyeachia shuti kali baada ya kukutana na krosi ya chini kutoka kwa Bernard Morrison aliyekuwa mwiba kwa safu ya ulinzi ya Singida United
Mu Ivory Coast Yikpe Gnamien aliyeingia kuchukua nafasi ya David Molinga, aliiongezea Yanga bao la tatu kwenye dakika ya 78 wakati bao la kufutia machozi kwa upande wa Singida United lilifungwa na Six Mwasekaga
Kikosi cha Yanga leo kilitandaza kandanda safi la kushambulia kwa kasi huku wakikaba kwa nguvu pale walipopoteza mpira
Kwa muda mrefu mlinda lango wa Yanga Metacha Mnata alikuwa hapati kashikashi kutoka kwa washambuliaji wa Singida United kutokana na uimara wa safu ya ulinzi ya Yanga
Singida United walitengeneza mashambulizi wakati mchezo huo ukielekea ukingoni
Huo ni ushindi wa kwanza kwa kocha Luc Eymael ambaye taratibu matunda ya kazi yake yameanza kuonekana
