Jioni ya leo Ijumaa, Disemba 27 2019 kikosi cha Yanga kitakuwa mkoani Iringa kuikabili Tanzania Prisons katika mchezo wa ligi kuu ya Vodacom
Mchezo huo awali ulipaswa kupigwa mkoani Mbeya lakini ulihamishwa baada ya uwanja wa Sokoine 'kuvurugwa' kwenye Tamasha la Muziki la Wasafi juzi
Mchezo huo hautakuwa mwepesi kwa Yanga kwani mpaka sasa Tanzania Prisons ndio timu pekee ambayo haijapoteza mchezo msimu huu
Tanzania Prisons inashika nafasi ya nne kwenye msimamo wa ligi wakiwa na alama 20 wakati Yanga wanashika nafasi ya 10 wakiwa na alama 18
Hata hivyo ushindi kwa Yanga utawawezesha mabingwa hao wa kihistoria 'kuchupa' mpaka nafasi ya tatu
Aidha baada ya kukosa ushindi katika michezo miwili iliyopita, mchezo huu ni muhimu kwa Yanga kuondoka na alama zote tatu
Yanga walifanya mazoezi ya mwisho jana mkoani Mbeya kisha kuondoka usiku kuelekea Iringa tayari kwa mchezo huo
