Sasa ni rasmi mshambuliaji Ditram Nchimbi anatua Yanga baada ya uongozi wa Azam Fc kuthibitisha kuwa tayari wamemalizana na Yanga
Nchimbi anatua Yanga wakati mwafaka kwani Januari 04 2020 mabingwa hao wa kihistoria watamuhitaji kwenye mchezo dhidi ya watani zao Simba utakaopigwa uwanja wa Taifa
Nchimbi anaungana na washambuliaji wengine David Molinga na Tariq Seif ambaye nae amesajiliwa hivi karibuni
Kwa wale waliokuwa wanadhani Yanga iliposema inautaka ubingwa msimu huu kuwa ni masihara, pole yao kwani mabingwa hao wa kihistoria wamedhamiria kwelikweli kuurejesha ubingwa Jangwani baada ya kuukosa kwa misimu miwili mfululizo
Nchimbi amepeleka mabao Yanga, kwani anajiunga na miamba hao wa soka Tanzania akiwa na mabao yake manne kwenye ligi
Ni idadi hiyo ya mabao pia amefunga mshambuliaji David Molinga 'Falcao'
Huku Molinga huku Nchimbi pale Tariq kazi ipo
Nchimbi ni aina ya washambuliaji ambao mabeki hawapendi kukutana nao kutokana na aina yao ya uchezaji
Ni mshambuliaji msumbufu, lakini pia anapouweka mpira mguuni ni vigumu kuupokonya
Aina yake ya uchezaji haitofautiani sana na Molinga pengine washambuliaji hao wanakwenda kutengeneza pacha hatari
Mshambuliaji Tariq Seif huenda akanufaika zaidi na uwepo wa washambuliaji hao kwani yeye kazi yake kubwa ni kufunga tu
Aina ya uchezaji wa Tariq unaweza kuifananisha na Amissi Tambwe
Ni mchezaji anayefahamu kujiweka katika mazingira ambayo yatampa nafasi ya kufunga
Ujio wa washambuliaji hao unakwenda kubadili kabisa taswira ya safu ya ushambuliaji ya Yanga
Nchimbi na Tariq ni wachezaji ambao wanaifahamu vyema ligi ya Tanzania Bara, hawatahitaji muda wa kuzoea mazingira kama ilivyokuwa kwa watangulizi wao Sadney Urikhob na Juma Balinya
Hawa wanaweza kuanza kuihesabia mabao Yanga mapema tu
