Jana Katibu Mkuu wa Yanga Dk David Ruhago ndiye aliyepewa jukumu la kwenda kumpokea mshambuliaji mpya wa timu hiyo Tariq Seif Kiakala aliyetokea nchini Misri
Dk Ruhago alimtaka mshambuliaji huyo kuhakikisha anatimiza malengo ya usajili wake ambayo ni kuifungia timu mabao
"Karibu sana Tariq, umekuja hapa kwa kazi moja tu, kufunga mabao, tunaamini utaifanya kazi hiyo bila wasiwasi," alisema Dk Ruhago
Tariq alikuwa nchini Misri kunako klabu ya Dekernes Fc ambayo hata hivyo hakuweza kuitumikia kwenye ligi baada ya kuchelewa kukamilisha usajili wake
Lakini alifanya vizuri kwenye michezo ya maandalizi ya msimu akiifungia timu hiyo mabao matano na kutoa pasi tatu za mabao
Dekernes Fc ilivutiwa na Tariq baada ya mshambuliaji huyo kufanya vizuri kunako klabu ya Biashara United msimu uliopita
Tariq alihusika kuinusuru Biashara United isiteremke daraja akifunga kwenye mechi tatu kati ya tano za mwisho
Ndiye aliyefunga bao pekee la Biashara United katika ushindi ambao Biashara iliichapa Yanga bao 1-0 kwenye mchezo uliopigwa Musoma
Msimu mmoja nyuma Tariq aliitumikia klabu ya Stand United
