Mashabiki wa Yanga walikuwa na matarajio makubwa kutoka kwa washambuliaji Sadney Urikhob na Juma Balinya ambao walitua Yanga kwenye usajili wa msimu huu
Balinya alitua kwa mbwembwe siku ya KUBWA KULIKO akitambulishwa ukumbini sambamba na kiungo Abdulaziz Makame 'Bui'
Sadney alichelewa kidogo lakini mashabiki walipagawa na 'mavitu' aliyokuwa akiyafanya kupitia video zake Youtube
Baada ya Yanga kumuuza Heritier Makambo aliyekuwa kinara wa kuzifumania nyavu, wengi waliamini kuwa wachezaji hao wangefanya zaidi ya kile kilichofanywa na Makambo msimu uliopita
Hata hivyo mambo yamekuwa tofauti, washambuliaji hao mpaka sasa kila mmoja amefunga bao moja tu kwenye ligi
Wakati kocha Charles Mkwasa akitangaza kufanyia maboresho safu yake ya ushambuliaji wakati wa dirisha dogo, pengine ni wakati wao kujitathimini
Hakuna shaka Yanga itawapa nafasi hadi mwishoni mwa msimu ili waonyeshe kama wanastahili kuendelea kuichezea Yanga
Lakini kama mambo yataendelea kuwa yalivyo, huenda wakaitumikia Yanga kwa msimu mmoja tu
Kwa sasa Yanga inamtegemea zaidi mshambuliaji David Molinga ambaye pamoja na kuwa nae hajaonyesha ubora ambao wengi wanautaka, lakini ameonyesha utofauti
Mabao manne aliyofunga kwenye ligi mpaka sasa yanadhihirisha kuwa yuko vizuri zaidi
Pengine usajili wa washambuliaji wapya utakuwa chachu kwa nyota hao kuimarisha viwango vyao ili wawanie nafasi kwenye kikosi cha kwanza
