Kikosi cha Yanga leo Ijumaa saa kumi jioni kitashuka kwenye uwanja wa CCM Kirumba kuikabili Alliance Fc ukiwa ni mchezo wa ligi kuu
Yanga iko jijini Mwanza tangu juzi ikijiandaa na mchezo huo unaosubiriwa kwa hamu na wakazi wa jiji la Mwanza na maeneo ya jirani
Hii itakuwa mara ya nne Yanga kukutana na Alliance Fc ambapo mabingwa hao wa kihistoria walishinda michezo yote mitatu waliyocheza msimu uliopita
Yanga inahitaji kushinda mchezo huo ili kuendelea kujiwekea mazingira mazuri ya kuurejesha ubingwa wa ligi kuu ambao uko mikononi kwa watani zao Simba kwa misimu miwili sasa
Hata hivyo mchezo hautakuwa mwepesi kwani Alliance Fc imeonekana kuimarika sana msimu huu
Aidha kipigo cha mabao 5-0 walichokipata kwenye mchezo uliopita kutoka kwa Azam Fc, kinawafanya watoto hao wa shule wawe na shauku ya kufanya vizuri leo
Kaimu kocha mkuu wa Yanga Charles Mkwasa amesema wamejipanga kuondoka na alama zote tatu
Yanga itarejea jijini Dar es salaam leo baada ya mchezo huo kwani Jumatatu inakabiliwa na mchezo mwingine dhidi ya KMC ambao utapigwa uwanja wa Uhuru
