Kaimu Kocha Mkuu wa Yanga Charles Mkwasa amesema ushindi wa mabao 3-1 dhidi ya Coastal Union leo katika mchezo wa kirafiki ni matokeo ya kile ambacho wamekuwa wakikifanyia kazi mazoezini
Akizungumza baada ya mchezo huo uliopigwa uwanja wa Taifa, Mkwasa amesema wachezaji wake waliweza kutekeleza kile alichowaelekeza licha ya changamoto kujitokeza kwenye umaliziaji hasa kipindi cha kwanza
"Tulicheza vizuri na kutengeneza nafasi nyingi kwenye kipindi cha kwanza lakini washambuliaji wangu hawakuwa wakijipanga vizuri hivyo kupoteza nafasi hizo"
"Tulikuwa imara katika ulinzi ndio maana umeona hata bao walilofunga Coastal Union lilikuwa la mchezaji wetu kujifunga. Tuliwabana wakashindwa kutengeneza nafasi za wazi"
"Kipindi cha pili niliwaambia wachezaji wangu waongeze presha langoni kwa Coastal Union, tulitengeneza nafasi nyingi baadhi tumeweza kuzitumia," alisema
Aidha Mkwasa amesema bado kazi kukiimarisha kikosi chake inaendelea lakini anaridhishwa na mwenendo wa timu mpaka sasa
"Mabadiliko yanaonekana, katika michezo ya nyuma hasa kipindi cha pili muda mwingi Yanga ilikuwa ikijilinda zaidi wakati mchezo ukiwa unaelekea mwishoni"
"Lakini jambo hilo halipo sasa, vijana wanajitahidi kucheza mpira muda wote na ndio maana leo wameweza kufunga mabao kwenye dakika za majeruhi"
