Timu ya Taifa ya Tanzania 'Taifa Stars' imeanza vyema kampeni ya kusaka tiketi ya fainali za Afcon 2021 baada ya kuichapa Guinea ya Ikweta mabao 2-1 katika mchezo uliopigwa uwanja wa Taifa
Guinea ya Ikweta ilitangulia kupata bao la kuongoza kupitia kwa mkongwe Pedro Obiang anayechezea Sassuolo inayoshiriki ligi kuu ya Italia, Serie A
Akiwa nje ya 18, Obiang alitandika mkwaju mkali ambao ulimshinda mlinda lango wa Stars Juma Kaseja
Stars iliyotawala mchezo huo kwa muda mwingi ilikosa bahati ya kutumbukiza mpira kimiani kwenye kipindi cha kwanza licha ya kutengeneza nafasi nyingi
Haikuwa siku nzuri kwa nahodha Mbwana Samatta ambaye majaribio yake yaliokolewa na mlinda lango wa Guinea ya Ikweta
Kipindi cha pili kocha wa Stars Etienne Ndayiragije alibadili mbinu za kimchezo akimuingiza mshambuliaji Ditram Nchimbi nafasi ya Hassan Kessy
Alibadili mfumo wa uchezaji kutoka 4-3-3 na kuwa 4-4-2 ambapo Erasto Nyoni aliyeanza mchezo kama kiungo mkabaji alirudi nyuma kucheza sambamba na Bakari Mwamnyeto wakati Kelvin Yondani akihamia upande wa beki wa kulia
Mabadiliko hayo yaliinufaisha Stars kwani iliendelea kutawala mchezo
Alikuwa ni Saimon Msuva aliyeisawazishia Stars kwenye dakika ya 68 baada kuwahi krosi iliyochongwa na Hassan Dilunga
Wakati mchezo huo ukielekea ukiongoni, Salum Abubakar aliihakikishia Stars alama tatu muhimu baada ya mkwaju wake aliopiga nje ya 18 kuzama nyavuni ukimshinda mlinda lango wa Guinea ya Ikweta
Ushindi huo unaiweka Stars kileleni mwa kundi J ikiwa na alama tatu na mabao mawili
Baadae Tunisia itachuana na Libya
Stars inatarajiwa kusafiri kwenda nchini Libya tayari kwa mchezo wa pili utakaopigwa Novemba 19
