Kiungo wa Yanga Mapinduzi Balama anaamini ujio wa kocha Charles Mkwasa umeongeza kitu kwenye kikosi cha timu hiyo
Pamoja na kuwa na timu kwa muda mfupi, Balama amesema kasi waliyoanza nayo chini ya Mkwasa ni ishara kuwa watafanya mambo makubwa zaidi mbeleni
"Ujio wake umetuongezea morali, sasa tunaendelea kuzielewa mbinu zake"
"Ni kocha ambaye kila mchezaji anafurahi kufanya nae kazi. Muda mfupi tuliokuwa naye ametuelekeza mambo mengi ya kiufundi. Amekuwa karibu na wachezaji"
"Naamini tutaendelea kufanya vizuri katika michezo yetu," amesema
Mkwasa aliiongoza Yanga kwenye mchezo dhidi ya Ndanda Fc uliofanyika mkoani Mtwara na Yanga kuibuka na ushindi wa bao 1-0
Atakiongoza tena kikosi cha timu hiyo kwenye mchezo wa ligi dhidi ya JKT Tanzania ambao utapigwa Novemba 23 katika uwanja wa Uhuru
Anaendelea kuwaandaa vijana wake katika mazoezi ambayo yanafanyika dimba la Uhuru
Balama amenufaika na ujio wa Mkwasa kwani katika mchezo dhidi ya Ndanda alichezeshwa nafasi ya kiungo, nafasi aliyokuwa akicheza wakati yupo Alliance Fc
Wakati Yanga ikinolewa na Zahera, Balama alikuwa akitumika kama mchezaji kiraka akicheza zaidi nafasi za winga na beki wa kulia
