Wakati wanaingia madarakani mwezi May, Wanachama na Mashabiki wa Yanga walikuwa na matumaini makubwa kwa viongozi mpya wakiamini kuwa hatimaye timu imewekwa kwenye mikono salama na sasa mambo yataanza kwenda sawa
Lakini wengi wamepata mshtuko jana baada ya aliyekuwa kocha mkuu wa timu hiyo Mwinyi Zahera kubainisha mambo mengi ya ndani ya uongozi yanayoashiria bado kuna mambo hayako sawa
Moja ya ahadi ambazo Dk Msolla alitoa wakati akiingia madarakani ni kusimamia mchakato wa mabadiliko ya mfumo wa uwendeshaji
Nadhani mpaka sasa wengi watakubali huu mfumo wa kutegemea wanachama na mashabiki kuchangia uendeshaji wa timu umeshindwa, ni wakati wa kwenda kwenye mfumo wa kibiashara zaidi ambao ni wa hisa
Pamoja na kampeni kubwa iliyofanyika ambayo iliingiza Milioni 920, lakini kama timu inazuiliwa Hotelini kwa kushindwa kulipia bili ya vinywaji ambayo ni laki tano, hiyo sio dalili nzuri
Hali haijulikani huko kwingine kama kwenye mishahara ya wachezaji na mengineyo ingawa inafahamika mpaka sasa bado iko changamoto kwenye kulipa madeni
Ni wakati kwa Wanayanga kukubali kuwa njia pekee ambayo itaiondoa timu kwenye changamoto za kiuchumi ni uendeshaji wa kisasa
Wanachama wanapaswa kuhoji kuhusu mwenendo wa mchakato wa mabadiliko ulipofikia na sio kuwaachia viongozi pekee waamue huko maofisini
Suala la mabadiliko katika vilabu vyetu hivi linakuwa gumu kwa sababu linagusa maslahi ya baadhi ya watu
Watu hao wako tayari kufanya lolote ili mradi tu kuendelea na mfumo ambao utaendelea kuwanufaisha
