Kwa Mwanayanga aliyepata nafasi kutazama mchezo wa marudiano kati ya Pyramids Fc dhidi ya Yanga uliopigwa nchini Misri, atakubali kuwa Pyramids Fc ilikuwa bora zaidi ya Yanga kwa uwezo wa kitimu na hata mchezaji mmoja mmoja
Ni timu ambayo inasadifu uwekezaji mkubwa ambao matajiri wa timu hiyo wamefanya
Pyramids Fc nadhani hawana muda mrefu wataanza kupata mafanikio makubwa katika soka la Afrika
Kwa Yanga yetu, nadhani bado kuna kazi kubwa inapaswa kufanyika
Pengine viongozi ni vyema wakatumia ushiriki huu wa mwaka huu kama somo ili kama timu itapata nafasi ya kushiriki msimu ujao, wafahamu nini wanapaswa kufanya ili timu iweze kufanya vizuri
Kwa timu ilipofikia wachezaji wanastahili pongezi, wamejitumia kwelikweli. Sidhani kama yupo wa kulaumiwa kwa upande wa wachezaji kwani juhudi zao zimeonekana kwenye michuano hii
Wakati mwingine unaweza kuelewa kwa nini Zahera alichukizwa na lawama alizokuwa anapewa baada ya timu kufungwa kwenye mchezo wa kwanza jijini Mwanza
Ni kwa kuwa alifahamu uwezo wa timu yake kulinganisha na Pyramids Fc
Ingawa kimsingi hawezi kukwepa lawama moja kwa moja kwa kuwa ni yeye aliyependekeza usajili wa wachezaji wote, japo kwa upande mwingine nae anajitetea kuwa usajili aliofanya ulikuwa kwa ajili ya Ligi
Kwa maana wakati wanasajili Yanga haikuwa na taarifa ya kushiriki michuano ya Kimataifa ambapo taarifa waliipata wakati michakato yote ikiwa imekamilika
Timu inahitaji maboresho
Safu ya ushambuliaji bado ni changamoto. Uongozi wa Yanga hauwezi kukwepa kuongeza nguvu wakati wa usajili wa dirisha dogo
Timu inahitaji washambuliaji wenye uwezo kuwazidi waliopo
Changamoto ya mabao bado itaendelea kuisumbua Yanga hata kwenye ligi kutokana na aina ya washambuliaji waliopo
Habari njema ni kuwa dirisha dogo la usajili litafunguliwa wiki chache zijazo hivyo Yanga itakuwa na nafasi ya kujiimarisha kabla ligi haijachanganya
