Kocha Mkuu wa Yanga Mwinyi Zahera anatarajiwa kukifanyia mabadiliko kikosi chake kitakachoivaa Pyramids Fc leo katika mchezo wa marudiano kusaka tiketi ya kutinga makundi kombe la Shirikisho
Katika mchezo wa kwanza uliopigwa Mwanza na Yanga kufungwa mabao 2-1, Zahera alimtumia Sadney Urikhob kama mshambuliaji pekee huku Papy Tshishimbi akimtumia namba 10
Lakini mabadiliko aliyofanya baadae kwenye kipindi cha pili kwa kuwaingiza Juma Balinya, Patrick Sibomana na Deus Kaseke, yaliiongezea ngvu safu ya ushambuliaji
Nyota hao wanaweza kuanzishwa kwenye kikosi cha kwanza leo
Nahodha Papy Tshishimbi huenda akarudishwa katika nafasi yake ya kiungo na pengine Balinya kuanzishwa safu ya ushambuliaji pamoja na Sadney
Wawili hao walicheza pamoja mechi dhidi ya Township Rollers iliyopigwa Botswana na Yanga kuibuka na ushindi wa bao 1-0, Balinya akifunga bao hilo kupitia mpira wa adhabu
Mabadiliko mengine huenda yakafanyika kwa Sibomana au Kaseke kuchukua nafasi ya Mrisho Ngasa ambaye mchezo wa kwanza haukuwa mzuri sana kwake
Mabadiliko pekee yanayotarajiwa kwenye safu ya ulinzi ni kwa Lamine Moro kuchukua nafasi ya Kelvin Yondani anayekosa mchezo wa leo akitumikia adhabu ya kadi mbili za njano
Leo Zahera hatakuwa na kikosi pungufu kama ilivyokuwa mchezo wa kwanza hali iliyopelekea kuwajumuisha walinda lango watatu katika kikosi
Yanga imesafiri Misri na kikosi cha wachezaji 20, wachezaji 18 watahitajika kwa ajili ya mchezo huo
