Wakati mjadala wa hatma ya kocha Mwinyi Zahera ukiendelea kushika kasi, kocha wa zamani wa timu hiyo Hans van Pluijm ni miongoni mwa wanaopigiwa chapuo kurithi mikoba ya Zahera huku mwenyewe akibainisha kuwa yuko tayari kurejea Jangwani
Pluijm anakumbuka kwa mafanikio aliyoipa Yanga kwa kutwaa mataji mawili ya ligi kuu msimu wa 2014-15 na 2015-16
Aidha msimu wa mwaka 2016-17 ambao kocha George Lwandamina alitwaa taji la tatu mfululizo, Pluijm alihusika kwenye mzunguuko wa kwanza
Pamoja na kocha huyo kupigiwa chapuo, bado kuna mashaka kama akirejeshwa ataweza kufanikiwa kutokana na hali ya Yanga ya sasa
Kipindi ambacho Pluijm alifanikiwa Yanga, Yusufu Manji alikuwa bado Mwenyekiti na Mfadhili Mkuu
Ni wakati huo ambao wachezaji walilipwa mishahara vizuri na Yanga ilikuwa na uwezo wa kumsajili mchezaji yeyote aliyetakiwa na Pluijm
Nyota kama Donald Ngoma, Thabani Kamusoko na Obrey Chirwa walisajiliwa kwa mapesa mengi
Mfano Chirwa peke yake alitua Yanga kwa dau la Milioni 200!
Lakini kama Pluijm atarejeshwa Yanga leo, atakuta mazingira tofauti
Yanga haina uwezo mkubwa wa kifedha kama ilivyokuwa mwanzo
Aina ya mpira unaofundishwa na Pluijm unahitaji wachezaji wa aina flani ambao kwa sasa Yanga hawapo
Na hata pengine akiwahitaji wachezaji hao, hawawezi kupatikana kwa urahisi kutokana na ufinyu wa bajeti ya usajili
Kwa ufupi, Yanga haina uwezo wa kifedha wa kusajili mchezaji yeyote kama ilivyokuwa wakati wa Manji
Naye hana mbinu mbadala
Wakati baadhi ya mashabiki wakimlaumu Zahera kwa kucheza mpira wa aina moja, hata babu Hans alikuwa akitupiwa lawama hizihizi kabla ya kuondolewa kwenye nafasi yake
Pamoja na kufundisha soka la kuvutia, hakuwa na mbinu mbadala pale timu ilipozidiwa
Ni majuzi tu ametimuliwa Azam Fc
Msimu uliopita Pluijm alitua Azam Fc akitokea Singida United ambayo aliinoa kwa msimu mmoja
Pale Azam Fc alipatiwa kila alichokitaka ikiwa ni pamoja na kusajili wachezaji wote aliowataka
Aliwachukua Donald Ngoma na Obrey Chirwa kutoka Yanga pamoja na kusajili wachezaji wengine
Lakini baada ya miezi saba Azam Fc ilimfungashia virago pamoja na Juma Mwambusi aliyekuwa kocha Msaidizi
Hapa jambo la kujiuliza Pluijm alishindwa kufanikiwa Azam Fc ambayo ina kila kitu ataweza kufanikiwa na Yanga hii ya sasa ambayo ni ya kuunga-unga?
Soka la Tanzania linabadilika kwa kasi sana, mbinu ambazo zilikupa mafanikio jana zinaweza zisikupe mafanikio leo
Ushauri kwa uongozi wa Yanga kama wanaona kuna ulazima kufanya mabadiliko benchi la ufundi basi ni bora wakaangalia makocha wa hapahapa nchini wawape timu mpaka mwishoni mwa msimu
La sivyo ni bora kuendelea na Zahera ambaye kikosi hiki amekiunda yeye, mpaka asasa amefahamu udhaifu ulipo anachohitaji ni muda ili kuondoa mapungufu yaliyopo
Lakini pia Yanga iliunda Kamati ya Ufundi ambayo ina watu kama kocha Charles Mkwasa (Katibu), Ally Mayay, kocha Ken Mwaisabula, Sunday Manara na wengine ambao ni wabobezi wa soka
Kamati hii iliundwa mahsusi kulisaidia benchi la ufundi
Nadhani kama wakiifanya kazi yao vizuri, kwa kushirikiana na kocha Zahera, wanaweza kuondoa baadhi ya mapungufu ambayo wengi wanaamini yanaikwaza Yanga kufanya vizuri
